Instituti i Librit dhe i Promocionit në bashkëpunim me Unionin e Gazetarëve Shqiptarë zhvilluan sot paradite në sallën Unesco të Muzeut Historik Kombëtar, promovimin e romanit të ri të shkrimtarit Odise Kote “Ura e Margaritës”.
Referuan në lidhje me këtë roman dhe risitë e tij, studiuesit Jorgo Bulo dhe Behar Gjoka, gazetari i mirënjohur Aleksandër Çipa, drejtori i Muzeut Historik Kombëtar M. Labi.
Na nderuan me pjesëmarrjen e tyre në këtë aktivitet të parë kushtuar këtij libri, deputetët Valentina Leskaj e Fatmir Toçi, ministri i Mirëqënies Sociale dhe Rinisë Erion Velia, kryetari i Bashkisë Gjirokastër Flamur Bime, akademiku Vasil Tole, drejtoresha e shkollës “20 Vjetori” Lumturie Vladi e shumë shkrimtarë, studentë e nxënës .
“Një nga veçantitë e letërsisë që shkrimtari Odise Kote lëvron janë qytetet që ai zgjedh për t’i vënë në qendër të romaneve të tij. Berati dhe kodikët e purpurt në kontekstin e Luftës së dytë Botërore kanë qenë tema kryesore e romanit të mëparshëm të tij “Betimi i rremë”. Dhe Gjirokastra me legjendat dhe historitë njerëzore të papërsëritshme që ka prodhuar gjatë historisë së çuditshme të konvertimit të fesë nën trysninë e pushtuesit otoman, është sfondi i rëndësishëm i romanit të ri “Ura e Margaritës”. Kalaja, pashai, haremi, qyteti i Gjirokastrës me ndërtimet karakteristike e mjeshtërore, Margarita që nuk e pranoi dot Hanushenë brenda saj dhe nuk iu nënshtrua destinës të stisur për të që nga Anadolli i largët, e çmendura me mendje të kthjellët Ifigjenë janë disa nga pikat e forta të romanit “Ura e Margaritës”.
Një roman i shkruar si një poemë me vargje homerike dhe një rrëfim me ngjyresa të kohës dhe të folmes së qytetit karakteristik të Gjirokastrës.” Nga Irena Toçi.
Posto një koment